Henrique G. Facuriella (Blimea, 1980) presenta'l so segundu llibru, 'Intersticios' (Ámbitu), una obra mui personal, depués de 'Los fieles de Maalena', novela espublizada en 2006. Facuriella, qu'estudió Periodismu na Facultá de Comunicación de la Universidá Pontificia de Salamanca, define esti nuevu trabayu como un testu más real col que «recrease nes emociones».

-¿Qué van atopar los llectores n'Intersticios?

-Intersticios, a pesar de tener namás que 96 páxines, contién una tipoloxía de testos bien estremada. Ábrese con un conxuntu de quince pieces en prosa poético que, baxo'l títulu 'Impresiones', describen los estaos d'ánimu del yo narrador en rellación, sobre too, colos elementos atmosféricos. Depués vien un testu de transición tituláu 'Ponte', que da pasu a la sección central del llibru: 'Notes cartográfiques pa un mapa de lo inesistente'. Ésta preséntase como un llibru de viaxes pero nel que lo importante nun son los sitios, sinón les emociones que se susciten nesos sitios, de tala manera que nun se dibuxa un mapa físicu, sinón emocional. La cuarta parte ye una selección de semeyes sacaes na Estación Norte d'autobuses de Barcelona nel añu 2002, al final del marcu cronolóxicu nel que s'escribió'l llibru, y acaba con una 'Esbilla de correspondencia non unviada', una colección de cartes qu'escribí nel mesmu periodu de tiempu que la sección central pero que nunca llegare a mandar a los sos destinatarios.

-Dicía Rosario Hernández na presentación del llibru que convién lleelu como poesía y non como prosa. ¿Ta d'alcuerdu?

-Ella referíase a que ye un llibru más pa sentir, pa disfrutar de la forma y recrease nes emociones que pa intentar descubrir qué ye lo qu'hai detrás de les palabres. Ella resumíalo cola espresión «más erótica y menos hermenéutica» y toi totalmente d'alcuerdu.

-¿Por qué cree que ye necesario reivindicar lo sagrao?

-Porque vivimos nun mundu mui atomizáu, por unes razones o por otres, caún enciárrase en sigo mesmu y mira namás que pa sí. Entiendo lo sagrao como lo contrario d'esa situación, como l'apertura a lo que ta más allá d'ún, a los otros o a Dios. Amás, considero que'l ser humanu ta abiertu a lo trescendente y, nel momentu que se-y corta esta conexón (o que nun se-y dexa desarrollar esa rellación), muerre espiritualmente.

-¿Qué diferencies o evolución atopamos ente'l so primer trabayu 'Los fieles de Maalena' y esti?

-Principalmente que 'Los fieles de Maalena' ye un llibru de ficción y en 'Intersticios' vese más clara la percha 'real'. Nesti últimu tamién hai un procesu d'introspeición más abiertu y una espresión menos tímida, menos pudorosa, de lo que yera en 'Los fieles...'

-El llibru tamién recueye delles semeyes y usté acaba de finar una amuesa n'Uviéu, ¿qué papel protagonicen?

-Como dicía enantes, les semeyes que tán nel llibru tan sacaes al mesmu tiempu que s'escribíen los últimos testos que se recueyen y formen una unidá por sí mesmes en rellación coles otres partes del llibru. L'escenariu ye una estación d'autobuses, un sitiu de pasu, un 'non llugar' y los retratos amuesen los sos habitantes. D'una manera más xeneral, la fotografía y la escritura son les dos formes coles que más me presta espresame.

-Lleva años trabayando en temes rellacionaos cola llingua asturiana, ¿cómo se ven les coses dende'l llau del escritor, del creador?

-Pues paezme que tol mundu, empezando peles alministraciones públiques, tenía que tomar más en serio tolo que tien que ver cola cultura y cola creación. Quitando unos pocos, pa la mayoría ye dalgo secundario cuando, pa mi, ye una de les paredes maestres de cualquier sociedá. Nesti sentíu, ye perimportante tresmitir esti valor de la cultura a les xeneraciones más nueves y dir faciendo llectores n'asturianu dende los primeros años.