OPINIÓN ARTICULOS
Xineru cambiante
15.01.08 -
EL primer mes del añu entra con fuerza faciendo honor a la so xerarquía nel calendariu. Muerre'l poeta Ángel González, lleguen les nieves poles que tanto nagüen esquiadores y políticos, y Gabino de Lorenzo, el 'Medici' uvieín, manga la capa española y sal al escenariu de protagonista.
D'Ángel González podríen decise milenta coses, pero ye abondo con recordar que, depués de munches décades, sigue siendo fonte d'inspiración pol respetu col qu'usaba les palabres y la verdá de los sentimientos que dientro d'elles dexaba trancaos. Nada en so escritura, y seguramente tampoco en so biografía, tenía'l tastu de lo circunstancial y lo marchito, nada podrecía col simple pasar del tiempu. Un escritor fíu del Uviéu de la Guerra Civil y la posguerra, aquella ciudá unívoca onde nun coyía más espresión que la d'apegase a la norma o callar, d'aquellos años cincuenta cuando s'asoleya 'Áspero mundo', el retratu d'un fíu de la guerra española. La capital d'Asturies tuvo daquella por alcalde a Valentín Masip (güei, un democristianu lliberal, en palabres del so descendiente eurodiputáu) y ye mui recomendable repasar les hemeroteques pa caer na cuenta de lo poco que s'asemeya aquella urbe provinciana a la ciudá qu'anguaño invade Sieru y Llanera. Yo conservo una edición orixinal de 'Palabra sobre palabra' dedicada pol autor a una persona cercana a mí. Nun sé si la muerte d'Ángel González, seguramente aguiyada poles gripes d'esti xineru soleyeru, yos dará más valor a eses páxines, unes páxines que-y permitieron ser profesor de Lliteratura n'Albuquerque (Nuevo México), pero que nun-y dexaben dar clases na burocratizada España porque nun tenía más títulu que'l de llicenciáu en Derechu. Una bona metáfora del país. La muerte del poeta tranca otra puerta más del sieglu XX que tovía tamos despidiendo a capítulos.
Por fin asomo y veo l'Aramu bien cargáu de ñeve, d'un cobertor blancu qu'atapa peñes y degoladeros, que tien pinta d'aguantar y que s'espurre dende la Gamonal al Gamoniteiru, algamando tamién al Monsacru. Pa los fanáticos del cambiu climáticu, a los que toi por axuntame y que tán alloriaos por ver cómo esti mes de xineru aporta secu y hasta caldiu dacuando, pa ellos, vien preñáu'l refraneru asturianu, que ye una fonte tan curiosa de consulta como les riestres estadístiques de datos climáticos. Unos pocos namás pa ilustrar y nun apolmonar: «Al bon xineru da-y fueu», contundente, o a cencielles, «Bon xineru mal iviernu». «Les alpargates de xineru son madreñes n'abril», o «Bon xineru y bon abril naide los vio venir», y tamién, «Bon xineru y bon San Xuan los nacíos nun verán». Resumiendo lo que nos espera: «En xineru les xelaes o lluegu pagaes, o en marzu doblaes». Ello ye, que debe ser inmemorial ver un xineru contrariu a les regles del clima, un iviernu folganzán que llega tarde y depués quier quedase hasta abril. Pero, enantes, l'iviernu tardiegu yera xera pa los campesinos y la so subsistencia y, agora, un iviernu galbanosu ye un enguedeyu políticu porque nun hai ñeve nes estaciones d'esquí. Esta primer nevada curiosa igual da p'abrir Fontes d'Iviernu unos díes, pero si nun torna xineru y se pon otra vegada a folgar, habrá qu'esquiar en yerba. ¿Nengún inxenieru o políticu tuvo vagar pa consultar el refraneru asturianu y certificar la vis traidora d'esti mes pa coles ufiertes d'ociu ivernal? Ye bona llástima que nun llean más.
Gabino de Lorenzo aprovecha tamién xineru pa echase a los costazos la xera de ganar les elecciones pal PP asturianu. Como nun soi péritu en comités electorales, nun sé si yá ta too fecho, pero eso nun ye lo importante. Lo notable ye que, por primer vegada depués de cuantisimayá, hai novedá nel apolmonáu y cafiante panorama políticu asturianu.
Nun sé si la so presencia va facer camudar el votu, a favor o en contra, a un asturianu siquier, pero hasta agora les elecciones xenerales desprecien n'Asturies a los candidatos porque nun venden más mercancía que la del cabezaleru de Madrid. Votamos Zapatero, Rajoy o Llamazares. El pesu, la masa atómica meyor, de Gabino camuda estes elecciones, les primeres en qu'un partíu estatal vuelve los güeyos a los mesmos votantes a los que-yos pide la papeleta, anque seya nesti casu pa llevar a Rajoy a la Moncloa. Viendo una decisión asina, poner tola munición disponible al serviciu electoral, los otros candidatos mengüen hasta quedar liliputienses, especialmente l'inefable Álvaro Cuesta. Hasta va haber algún asturianista que, visto que nun tien alternativa clara y qu'agora Gabino dacuando pon boina y diz 'ye', lu va votar escondiendo la mano dientro d'un bon guante.
Xineru camudará otres venti veces enantes de morrer y regála-y a febreru'l llabor del iviernu, pero'l que yá nun torna, de xuru, ye Ángel González y lo que yá nun va ser igual, de xuru, son les elecciones de marzu.
D'Ángel González podríen decise milenta coses, pero ye abondo con recordar que, depués de munches décades, sigue siendo fonte d'inspiración pol respetu col qu'usaba les palabres y la verdá de los sentimientos que dientro d'elles dexaba trancaos. Nada en so escritura, y seguramente tampoco en so biografía, tenía'l tastu de lo circunstancial y lo marchito, nada podrecía col simple pasar del tiempu. Un escritor fíu del Uviéu de la Guerra Civil y la posguerra, aquella ciudá unívoca onde nun coyía más espresión que la d'apegase a la norma o callar, d'aquellos años cincuenta cuando s'asoleya 'Áspero mundo', el retratu d'un fíu de la guerra española. La capital d'Asturies tuvo daquella por alcalde a Valentín Masip (güei, un democristianu lliberal, en palabres del so descendiente eurodiputáu) y ye mui recomendable repasar les hemeroteques pa caer na cuenta de lo poco que s'asemeya aquella urbe provinciana a la ciudá qu'anguaño invade Sieru y Llanera. Yo conservo una edición orixinal de 'Palabra sobre palabra' dedicada pol autor a una persona cercana a mí. Nun sé si la muerte d'Ángel González, seguramente aguiyada poles gripes d'esti xineru soleyeru, yos dará más valor a eses páxines, unes páxines que-y permitieron ser profesor de Lliteratura n'Albuquerque (Nuevo México), pero que nun-y dexaben dar clases na burocratizada España porque nun tenía más títulu que'l de llicenciáu en Derechu. Una bona metáfora del país. La muerte del poeta tranca otra puerta más del sieglu XX que tovía tamos despidiendo a capítulos.
Por fin asomo y veo l'Aramu bien cargáu de ñeve, d'un cobertor blancu qu'atapa peñes y degoladeros, que tien pinta d'aguantar y que s'espurre dende la Gamonal al Gamoniteiru, algamando tamién al Monsacru. Pa los fanáticos del cambiu climáticu, a los que toi por axuntame y que tán alloriaos por ver cómo esti mes de xineru aporta secu y hasta caldiu dacuando, pa ellos, vien preñáu'l refraneru asturianu, que ye una fonte tan curiosa de consulta como les riestres estadístiques de datos climáticos. Unos pocos namás pa ilustrar y nun apolmonar: «Al bon xineru da-y fueu», contundente, o a cencielles, «Bon xineru mal iviernu». «Les alpargates de xineru son madreñes n'abril», o «Bon xineru y bon abril naide los vio venir», y tamién, «Bon xineru y bon San Xuan los nacíos nun verán». Resumiendo lo que nos espera: «En xineru les xelaes o lluegu pagaes, o en marzu doblaes». Ello ye, que debe ser inmemorial ver un xineru contrariu a les regles del clima, un iviernu folganzán que llega tarde y depués quier quedase hasta abril. Pero, enantes, l'iviernu tardiegu yera xera pa los campesinos y la so subsistencia y, agora, un iviernu galbanosu ye un enguedeyu políticu porque nun hai ñeve nes estaciones d'esquí. Esta primer nevada curiosa igual da p'abrir Fontes d'Iviernu unos díes, pero si nun torna xineru y se pon otra vegada a folgar, habrá qu'esquiar en yerba. ¿Nengún inxenieru o políticu tuvo vagar pa consultar el refraneru asturianu y certificar la vis traidora d'esti mes pa coles ufiertes d'ociu ivernal? Ye bona llástima que nun llean más.
Gabino de Lorenzo aprovecha tamién xineru pa echase a los costazos la xera de ganar les elecciones pal PP asturianu. Como nun soi péritu en comités electorales, nun sé si yá ta too fecho, pero eso nun ye lo importante. Lo notable ye que, por primer vegada depués de cuantisimayá, hai novedá nel apolmonáu y cafiante panorama políticu asturianu.
Nun sé si la so presencia va facer camudar el votu, a favor o en contra, a un asturianu siquier, pero hasta agora les elecciones xenerales desprecien n'Asturies a los candidatos porque nun venden más mercancía que la del cabezaleru de Madrid. Votamos Zapatero, Rajoy o Llamazares. El pesu, la masa atómica meyor, de Gabino camuda estes elecciones, les primeres en qu'un partíu estatal vuelve los güeyos a los mesmos votantes a los que-yos pide la papeleta, anque seya nesti casu pa llevar a Rajoy a la Moncloa. Viendo una decisión asina, poner tola munición disponible al serviciu electoral, los otros candidatos mengüen hasta quedar liliputienses, especialmente l'inefable Álvaro Cuesta. Hasta va haber algún asturianista que, visto que nun tien alternativa clara y qu'agora Gabino dacuando pon boina y diz 'ye', lu va votar escondiendo la mano dientro d'un bon guante.
Xineru camudará otres venti veces enantes de morrer y regála-y a febreru'l llabor del iviernu, pero'l que yá nun torna, de xuru, ye Ángel González y lo que yá nun va ser igual, de xuru, son les elecciones de marzu.
