Cultura
Memoria d'un tiempu fecundu
29.04.08 -
ALITAR ye un verbu que significa recobrar l'aliendu, l'álitu vital; y con elli la salú y la vida que paecía dir pal acabón. Tien que ver cola esperiencia humana de ver a un ser queríu recobrar l'aliendu cuando paecía dir empobináu a la muerte ensin remediu. Y lleva asociada la idea de qu'esi alitar 'in extremis' débese a una intervención provindencial, humana o divina, que fai posible'l milagru y que, de nun ocurrir a tiempu, diba poner al enefermu nes manes de la muerte.
Per aquel entós (allá na década de los años 70 del sieglu pasáu) unos pocos asturianos escomencipiemos falar de la necesidá d'Alitar Asturies; porque alvertíamos a les clares que la nuestra patria (el nuestru «país», como con propiedá solía escribir Xovellanos) diba camín de morrer: la economía diba arruinando y les nueves xeneraciones desconocíen, y hasta despreciaben, la llingua y la cultura tradicional. Ensin decatase d'ello, los asturianos diben dexando de ser asturianos pa ser otra cosa (o más bien pa nun ser nada) y, de resultes, Asturies diba dexando adulces de ser Asturies.
Había qu'Alitar Asturies; y unos pocos punxímosmos al llabor de busca-y remedios al mal. Y escomencemos por aquello que mos paecía más urxente y de lo qu'entendíemos un daqué: recuperar y diginificar l'idioma propiu, estudiándolu y escribiéndolu. Y dende esa estaya dir enanchando pa otres (la música, la etnografía, la economía...)
Y podemos tar bien contentos de lo que ficimos porque, inda ensin ser mélicos espertos, sinón aguiyaos namás que pola voluntá y l'amor a la tierra, fuimos quien a entretener la muerte a les puertes de la casa, y alitar un daqué l'Asturies enferma; pa dar ocasión a la llegada d'otros tiempos, otros medios y otres xeneraciones, más arteres y preparaes, que sigan col llabor que nós entamemos cuantayá: Alitar Asturies.
Nadie nun piense que lo algamao ye poco pa trenta años de trabayu: Na vida d'un pueblu milenariu, esi tiempu equival a un par d'años na vida d'un paisanu. De manera que lo que ficimos nun ye más que lo equivalente a les cures d'urxencia y la primera hospitalización.
Queda muncho por facer: una llarga rehabilitación de décades na que tendrán d'andechar más y más asturianos y asturianes; xente mayor con esperiencia y xente mozo con voluntá y entusiasmu y que yá conoz el sabor del pan fecho cola sema d'aquel tiempu fecundu.
Xente que tendrá de seguir amando, semando y trabayando p'Alitar Asturies.
Per aquel entós (allá na década de los años 70 del sieglu pasáu) unos pocos asturianos escomencipiemos falar de la necesidá d'Alitar Asturies; porque alvertíamos a les clares que la nuestra patria (el nuestru «país», como con propiedá solía escribir Xovellanos) diba camín de morrer: la economía diba arruinando y les nueves xeneraciones desconocíen, y hasta despreciaben, la llingua y la cultura tradicional. Ensin decatase d'ello, los asturianos diben dexando de ser asturianos pa ser otra cosa (o más bien pa nun ser nada) y, de resultes, Asturies diba dexando adulces de ser Asturies.
Había qu'Alitar Asturies; y unos pocos punxímosmos al llabor de busca-y remedios al mal. Y escomencemos por aquello que mos paecía más urxente y de lo qu'entendíemos un daqué: recuperar y diginificar l'idioma propiu, estudiándolu y escribiéndolu. Y dende esa estaya dir enanchando pa otres (la música, la etnografía, la economía...)
Y podemos tar bien contentos de lo que ficimos porque, inda ensin ser mélicos espertos, sinón aguiyaos namás que pola voluntá y l'amor a la tierra, fuimos quien a entretener la muerte a les puertes de la casa, y alitar un daqué l'Asturies enferma; pa dar ocasión a la llegada d'otros tiempos, otros medios y otres xeneraciones, más arteres y preparaes, que sigan col llabor que nós entamemos cuantayá: Alitar Asturies.
Nadie nun piense que lo algamao ye poco pa trenta años de trabayu: Na vida d'un pueblu milenariu, esi tiempu equival a un par d'años na vida d'un paisanu. De manera que lo que ficimos nun ye más que lo equivalente a les cures d'urxencia y la primera hospitalización.
Queda muncho por facer: una llarga rehabilitación de décades na que tendrán d'andechar más y más asturianos y asturianes; xente mayor con esperiencia y xente mozo con voluntá y entusiasmu y que yá conoz el sabor del pan fecho cola sema d'aquel tiempu fecundu.
Xente que tendrá de seguir amando, semando y trabayando p'Alitar Asturies.
