Borrar
EL PUEBLU. Vista xeneral de la localidá de Bueñu, qu'homenaxea Camilo Pantigo. / MARIO ROJAS
Piropu pal pueblu de Bueñu XOSÉ LLUÍS CAMPAL FERNÁNDEZ
POETES ASTURIANOS DE ENTRESIEGLOS (XIX-XX) CAMILO PANTIGO

Piropu pal pueblu de Bueñu XOSÉ LLUÍS CAMPAL FERNÁNDEZ

PPLL

Martes, 13 de mayo 2008, 10:29

Necesitas ser suscriptor para acceder a esta funcionalidad.

Compartir

La famosísima composición dieciochesca del clérigu Bruno Cepeda 'Bayura d'Asturies' creó escuela, como amuesa la composición qu'aportamos güei, espublizada na revista habanera 'Asturias' correspondiente al 17 d'ochobre de 1915. Nella, Camilo Pantigo fai un hiperbólicu memorándum de les riqueces agropecuaries y ornitolóxiques qu'el pueblu de Bueñu atesoraba nos entamos del sieglu pasáu y que danmos idega, coles llimitaciones qu'impón el gayoleru sintir localista del autor (pa él nun hai quilos, sinón tonelaes de too), d'una bonal collecha qu'apinaría los horros y tenaes de recursos a mamplén: dende peres, mazanes, cereces, guindes o nueces fasta freses, figos, maíz, patates, cebolles y toa castra legumes.

La poesía 'Bueño' sedría, talanto, una emponderatible carta de presentación cola que los vecinos d'esta colación de La Ribera d'Arriba asitiaos na emigración cubana presumiríen de tolo que dexaren nel Principáu, rexón idealizada que, según Pantigo, por nun tener nun tenía nin enfermedaes, inxenuidá qu'esaniciaba dafechu la realidá mélica d'aquelles llonxanes dómines. Llean:

Pueblu alegre y bona xente,

moces guapes como roses,

onde Dios dexó simiente

p'aniciar de to les coses.

Por eso tenemos cereces,

freses, figos y castañes,

piescos, recimos y nueces,

cirueles, peres, pavías,

carápanos de los grandes,

marmiellos, albaricoques

(éstos comunes y riales)

y si acasu en Rebolón

tamién se cueyen ablanes.

Hay arbeyos y patates,

ayos, cebolles, pimientos,

berces, repollos, tomates,

fréjoles tempranos, tardíos,

fabes redondes y llargues

(que si en Castilla son xudíes,

aquí serán siempre fabes).

La mar de maíz pinao

pa llenar cien mil paneres

anque sea hasta el teyao;

y tamién de lo redondo

hay pa cebar el ganao

y tavía sobra abondo.

Y de todo hay varies clases,

pos cereces hay tamién,

unes que son llabianes,

otra clase de negreres,

y otres guindones o blanques.

De guindes ye'l acabóse;

hasta les hay garrafales.

Solo diendo a Quintaniella,

e'na huerta de Costante

puen cargase venti barcos

y ta queden otres tantes.

Hay figos carapuzones

y otros que se llamen blancos,

y p'an ciertes ocasiones

hailos negros y tempranos.

De freses hay tonelaes

y to los dis les muyeres

marchen pa Uvieo a carreres

con miles de manegaes.

Hay nueces que son valeres

y son otres moyerines;

castañes hay palaciegues,

pelones, santamariñes,

servandes, braves, verdueles

y baldunes sabrosines.

Mazanes hay de camuesa,

de balsaín y mingán,

tamién les hay de folleca,

y de parda y de raneta,

de por Santiago y San Xuan,

y anque non sé cómo son

tamién les hay de riñón.

Hay peres de media libra

y casi que de libra entera,

unes que non tienen pevida

y otres nin gaspia siquiera.

Vense raitanes, xaulinos

(xilgueros) y coroneles,

papudes, capellancinos,

calandries y veraninos,

verderones, llevanderes,

picatueros y coites,

glayos, gordos y pegues;

hay gurriones y cerriques,

y coruxes y malvises,

y páxaros especiales

que sin gabíes nin guindones,

siempre lleguen ocasiones

de garralos e'nos niales.

En cambiu, no hay teriz,alfe/ recí,

pilesia, menengites,

tabardillo, polmonía,

tifos, gripe, blonquites,

gotera, rema, pluresía,

herpes, vexigues, nuralgies,

metrites, grándules, nostalgies,

anxines, sarpullíos, asma,

picores. eczemes, sarna,

hestéricu, debilidaes,

sordera, toses, parálises,

mal de corazón nin fégadu

nin otres calamidaes.

Por eso naide se quexa

nin de dengue nin trancazu,

nin se conoz la xaqueca,

nin se vio nunca'l catarru,

porque'l agua la Llamiella

to los males taramiella

y ye aquí el meyor cerexanu.

Reporta un error en esta noticia

* Campos obligatorios