Secciones
Servicios
Destacamos
XOSÉ LLUÍS CAMPAL FERNÁNDEZ
Martes, 19 de agosto 2008, 05:46
Necesitas ser suscriptor para acceder a esta funcionalidad.
Compartir
Nel branu de 1919, Francisco González Prieto diose una revolada pel conceyu llaviniegu y depués romanciólu nun testu entituláu 'Un viaje a Laviana', que s'inxertó nel númberu del 21 d'avientu d'esi añu de 'Asturias', revista fecha na ciudá de L'Habana pa la bayurosa colonia rexonal. Nél, recueye Pachu'l Péritu les sos andances amorosiegues y les atenciones que recibiera nel Círculu Católicu y nes aldegues de Tiraña y Llorío demientres les sos fiestes añales.
Xunta fartures (l'autor aprovecha pa criticar lo que xinta'l cleru y lo que se-y ufierta a los probes de la collación) y bailles, apaez l'autor (que tampoco nun dexa pasar la ocasión pa dase pote) en bon amor y compaña de xente conocío del mundu lliterariu, como ye'l casu del poeta satíricu xixonés Fabriciano González García, 'Fabricio' (del que mos ocuparemos equí nos meses vinientes), o quiciabes tamién del presbíteru Maximiliano Arboleya, fundador de sindicatos agrarios pa católicos y activu periodista de cuñu conservador.
Ésti ye'l memorándum del so viaxe a Llaviana que Pachu'l Péritu mos apurre:
-¡Hola, Pachu!, ¿ya vinieste?
¿Qué tal te fo per Laviana?
-Si hubies teníu vagar
d'afechu allá me quedara.
-Entós tratárente bien:
verís danguna rapaza
que te'ncandiló los güeyos
con so palmín i so gracia.
-Ver vi munches melguerines,
y más chusques que la Xana;
pero una xunta l'al cárcel
aprisionárame'l alma.
En cuantes que vi a Mercedes
al mirador asomada,
con so carina de rosa
y so risina galana,
embolismáu quedé
como'l paxarín del alba
que gorgolita 'na sebe
a la lluz de la llumbrada.
Yera como l'aura, suave,
como l'azucena, blanca,
y fresca como'l rocíu
que pelres d'amor ensarta.
Tras de xeranios i mirtos
dexando 'ntrever so cara,
mirábame de soslayu,
y díxei: «Fasta mañana».
Entós andebo pel pueblu
con amigos de confianza,
pos 'nel 'Círculo Católicu'
fiximos una Velada.
Yera fiesta 'na parroquia;
y dempués de la fabada,
xuntóse la clerecía
n'aquel salón. Platicaba
con toos a mio manera,
como agora, 'n sin sostancia,
de paxarinos i flores,
verbenes, cuintos, 'pigramas.
Ellos palmiaben i rinse,
yo taba fala que fala,
y a la postre despidiémonos
con amistá i algazara.
Pero hebo mayor folixa
en Lorío i en Tiraña,
qu'allí yo fo cuasimente
el gallu de la quintana.
La fiesta tevo perbona:
hebo la misa cantada,
y 'cho'l sermón Secundinu,
el que predicó'n Laviana.
Elli, como é falatible,
malapenes se prepara,
y fala com'un breviariu
unes verdaes que plasma.
Saliera la prusición
al son de tambor i gaita;
y el párracu de Lorío
convidó al cleru'n so casa.
Saliemos al utru día
pa la fiesta de Tiraña,
y antes de vesitá'l Santu
fuimos a tomá la parva.
Entamaren de cantar
los de pelliz i el de capa;
y el párracu de San Claudiu
echara una bona plática.
Amigu, la prusición,
allí sí que tevo tala:
co los cuetes d'a palenque
al frañise la campana.
¡Si vieres la clerecía
cantando al son de la gaita
y el sacristán 'Tíu Estébanu'
cómo los botafumiaba!;
el paliu puestu al revés,
el suelu'stráu d'espadaña,
y cayer los rapacinos
por dir tres d'una xiralda.
Cuando'n altarín de piedra
ponín el Veril de plata,
tiraben flores les neñes
y la xente s'enclucaba;
¡qu'al oyir el 'Tantum ergo'
acompangáu co la gaita,
de rodíes te punxeras
y como Pachu rezaras!
Cuando s'acabó la fiesta,
dio'l párracu de Tiraña
llibres de pan a los probes
y a los cures la fabada.
Entós fuimos al Camporru
en gran amor i compaña,
Fabriciu, Escobedu i yo,
qu'Elvira mos convidara.
Hebo ballura de tou,
y bona sidre de casa,
música d'armoniflú,
y de tambor i de gaita.
Y comiemos i bebiemos,
hebo plática y folgancia:
Masimilianu i Elvira
enllenáronmos la panza.
Dempués de bailar abondo
co les moces de Tiraña,
fasta la fonte d'Agüeria
diemos una caminada.
Fuximos al utru día
pa la fiesta de Laviana,
conservando del Camporru
afleutu i memoria grata.
E'nel 'Llagar de Zapico',
pa fin de fiesta, pillámosla,
sabolgando 'na praera
el zume de la mazana.
Publicidad
Publicidad
Te puede interesar
Publicidad
Publicidad
Reporta un error en esta noticia
Comentar es una ventaja exclusiva para suscriptores
¿Ya eres suscriptor?
Inicia sesiónNecesitas ser suscriptor para poder votar.