13.06.09 -
El cuentu 'Ella y Ariel', del candasín David Artime Coto, foi'l ganador de la segunda edicición del concursu lliterariu Arbidel de cuentos eróticos n'asturianu, organizáu pol Ayuntamientu de Ribeseya. Artime, periodista de profesión, defiende los concursos lliterarios como forma de que la llingua asturiana «escape del so guetu».
-¿De qué trata'l relatu ganador del certame?
-Ye un cuentu que narra una rellación de dominación/sumisión ente dos muyeres que, de primeres, paez que se conocieron casualmente. El final de la historia revela que nun foi asina. Tien abonda carga de fetichismu y ciertu conteníu de 'bondage', pero bono, prefiero nun contar más y que la xente s'anime a lleelu. A quien-y interese mándo-ylu per corréu electrónicu.
-¿Ye la so primer incursión na lliteratura erótica?
-Sí. Y la verdá que foi toa una esperiencia xuntar nun cuentu de 20 páxines una mecigaya de toles fantasíes erótiques que pasaron pela mio tiesta nos últimos años.
-Anque'l certame Arbidel acaba nacer, ta llogrando una bona aceutación y popularidá. ¿Qué-y paecen esti tipu de premios?
-Toi encantáu de que la llingua asturiana cuente con esti tipu de concursos. Tien falta d'ello p'algamar escapar d'esi guetu de ruralidá, folclorismu, mitoloxía y costumismu tradicional nel que ta metida dende hai tiempu. Un concursu de relatos eróticos n'asturianu obliga a la xente a introducir a esti idioma en temátiques novedoses, y ello contribúi a la normalización. La verdá ye que ye la cuarta vez que me presento a ún concursu lliterariu.
-¿En qué otros xéneros se siente más cómodu escribiendo?
-Lo que más me presta escribir, y pienso que nun lo faigo mal, son artículos d'opinión de temática política. Pero como la mio opinión nun ye politicamente correcta, téngolo complicao. Tamién tengo cierta facilidá pa escribir cantares (que non poemes) de carácter críticu o reivindicativu. De fechu, faigo lletres pal grupu Skama La Rede. Sicasí, dempués de ganar el Arbidel tomé la decisión d'entamar a escribir ficción, un xéneru qu'había tiempu que nun trabayaba. Concretamente, dende que fici l'adautación al teatru de la novela 'José', d'Armando Palacio Valdés, que se representó en Candás dirixida pol cineasta Pablo Quiroga.
-¿Cómo entamó nel mundu lliterariu?
-Entamé participando nos concursos de cuentos qu'organizaba l'Ayuntamientu de Carreño pa los neños de les dos escueles de Candás. Cuando taba en segundu cursu gané'l concursu y aficionéme a escribir coses. El problema foi qu'en terceru escribí otru cuentu muncho meyor que'l del añu anterior, y como nun gané, enfadéme y tuvi unos años sin garrar el bolígrafu.
-Usté ye periodista. ¿El día a día d'esti trabayu pue ser una bona fonte d'inspiración pa los relatos?
-Total. Por exemplu, yo trabayé dellos años como corresponsal llocal en dellos conceyos d'Asturies. Les situaciones que vives y los personaxes que conoces, sobre manera nos Ayuntamientos, son grandes xeneradores d'inspiración pa 'thrillers' o histories de costumismu modernu.
-¿Hai falta d'una apuesta de la sociedá asturiana pal reconocimientu de la llingua?
-Yo pienso que la sociedá asturiana yá apuesta pol reconocimientu oficial de la llingua. El problema ye que pa la mayor parte de la sociedá esta apuesta nun ye prioritaria. Anque yá s'avanzó muncho, el pueblu asturianu sigue avergoñándose de la so forma de falar. Sigue viéndola como espresión de ruralidá, inorancia o vulgarismu. Esa torga sólo se va superar con una auténtica normalización, y ésta creo que sólo va venir cola oficialidá.
-¿Tien en proyeutu dalguna novela?
-Sí. Toi escribiendo una novela. Dientro unos meses, si algamo que me la publique dalgún alma caritativa, contarévos de qué va. Nun ye erótica, pero tamién trata un tema virxe na lliteratura asturiana.
