Produz hasta vergüenza tener que siguir aprofiando no evidente del títulu d'esta carta. El casu ye qu'últimamente nun paren de lleganos declaraciones por parte de dirixentes de la FSA y miembros del Gobiernu asturianu identificando 'llingua oficial' con 'llingua obligatoria'. Les últimes, de Javier Fernández y Ana Rosa Migoya. Cansa ver que nun hai quien los pose de la burra, y yá nun hai quien creya que sía namás desinformación lo que ta detrás d'estes declaraciones. Tal paez que'l día que l'asturianu sía oficial n'Asturies vamos tener que cambiar toos de llingua de la nueche a la mañana pa que nun nos metan presos. La sociedá asturiana yá nun cree nesos cuentos y ta -como indiquen toles encuestes feches hasta agora, encargaes por ellos, masque nun-yos guste lo que sal- perfectamente preparao pa da-y la dignidá y el futuru que'l so idioma propiu merez, lo que pasa necesariamente pola condición d'oficial xunto col castellanu.

¿Sedrá que los derechos d'una parte de los asturianos nun-yos dan más a estos señores? Qu'una llingua sía oficial namás quier dicir qu'esa llingua ye d'usu válidu a tolos efectos por parte de los ciudadanos d'un territoriu nes relaciones cola Alministración. Lo qu'implicará, normal, qu'hebia funcionarios que puedan atender a los alministraos que se dirixan a ellos n'asturianu, porque pa eso ta l'Alministración, p'atender a los ciudadanos, equí y en Roma. Eso que ta garantizao pal castellanu, y ye normal que sía asina, ye lo que se pide pal asturianu. Nin más nin menos. Lo que nun se val ye l'argumentu de la imposición. ¿O daquién con dos deos de frente pue pensar que porque el llinguaxe de signos vaya ser oficial diquiá poco en tol territoriu español, vamos tener que nos entender toos asina? A too esto, ¿pue tamién la FSA facer una declaración de por qué nun tán d'acuerdu cola proposición non de llei presentada apocayá nel Congresu pol grupu parlamentariu socialista, na que se diz que la protección y impulsu de les llngües propies nes comunidades con llingua cooficial «no sólo no se ha producido en menoscabo de la lengua común, sino que ha generando una dinámica de convivencia lingüística»? ¿En tan poca estima nos tienen a los asturianos?