Según el portavoz socialista na Cámara asturiana, l'asturianu nun trunfa y IU debería dexar pa otra ocasión les sos postures sobre la cuestión. Toi cansáu d'oyer a estos dirixentes sociallistes dicir ensin ruborizase mentires qu'ellos mesmos esparden como verdá. L'asturianismu ye l'únicu movimientu que trenta años dempués, dende que hai democracia y Estatutu d'Autonomía, sigue ehí. Pasaren les reconversiones, la reorientación económica d'Asturies, les eleiciones, pasó de too, too acabó como acabó. Lo único que sigue en pie d'aquellos años ye la negación de los derechos llingüísticos, lo único la reivindicación de los mesmos.

Si por ellos o pola demanda social fuera, nin estatutu d'autonomía tendríemos. ¿Ónde tuvo la demanda social pidiendo competencies n'Educación, o en Sanidá, o siquier Estatutu d'Autonomía? ¿Dende cuando la política estatal y comunitaria se fae por demandes sociales? ¿A quién consultó'l PSOE pa reformar estatutos, pa prohibir el tabacu, pa mandar tropes a Bosnia, etcétera? ¿Ónde taba esa demanda social, esa idega que trunfa? Si por estos dirixentes, con una bona Diputación sería abondo... Dicen que'l tema nun interesa, pero cada dos por tres tienen que dicir daqué, porque daquién-yos saca'l tema. Habría que ver cuántes páxines de periódicu lleva enllenao'l tema, a ver si enllenó dalgún asuntu más. Ante la falta d'argumentos nieguen lo qu'hai, dicen d'obligatoriedá, será esa obligatoriedá que fae que ún tenga d'acabar por rellenar los papeles en castellanu porque nun los hai n'asturianu, la que fae que tenga de ver la tele en castellanu porque nun la hai n'asturianu, etcétera. Enxamás vi a naide diciendo «a mí fálame n'asturianu», pero sí «a mí háblame en castellano». Yá nun tienen argumentos nin dialeutu nin munchos bables nin nada. Nada de too eso cuela yá, agora sólo queda'l nun me da la gana. Y la verdá, nun acabó d'entender qué-yos ficieron a ellos la llingua y la cultura d'Asturies pa tene-yos tanta tirria. ¿Serán como los nuevos ricos que s'avergoñen de ser fíos de trabayadores?