YE verdá que cualquier afición nuestra, por mui peregrina que seya, puede llegar a convertise nuna pasión. Parez ser que la naturaleza humana ye aficionada a facer de lo inútil virtú. Por eso hai xente que se dedica a la cría del bonsái o la clásica colección de sellos cola mesma devoción cola que Miguel Ánxel s'entregaba a pintar los techos de la Capiella Sixtina. Son aficiones curioses y cásique siempre respetables, que nos llenen los furacos de los díes.

Sin embargu, hai otres pasiones que nos trescienden y nos proxecten p'hacia los otros y el mundu. Éstes son les que nos lleven al arte, a la lliteratura, a la ciencia y son, por decir, de la categoría opuesta a les primeres. Son les pasiones que nos fain reflexionar sobre lo que somos y sobre lo que podemos ser. D'ehí salen les grandes obres de tolos artes pero tamién esos otros pequeños llogros cotidianos que, con un pocu de dedicación y talentu, nos fain la vida más entretenida y lliviana. Nesta categoría intermedia ta esa novela que lleímos el pasáu branu na playa y qu'olvidamos rápidamente pero que nos fizo pasar un ratu entreteníu, ta tamién la película que nos prestó y que nos fixo reir anque depués nun nos alcordamos del títulu, ta l'oliu naif que compramos nun mercadillu y que nos pon color y vida na sala de casa y ta esi cantarín que tarareamos mientres conducimos camín del trabayu.

Yo cada vez toi más agradecida a la xente que cola so pasión y el so talentu nos fai la vida -de por ello abondo gris y mediocre- un poco más alegre y divertida. Y dígolo porque esti fin de selmana tuvi nel mio pueblu nuna actuación de los Ermitaños del Río, un grupu de mozos del pueblu qu'acaben de sacar el so primer discu. Ellí, sobre l'escenariu, tocaben los que fueran hai unos pocos años los nuestros alumnos del institutu de Cangues. Yo nun sé lo que conseguimos deprende-yos nesos años o lo que deprendieron a pesar nuestru. Lo que sí sé ye que falen de les agües cambiantes del ríu Dobra como del ríu d'Heráclitu y qu'apliquen el 'tempus fugit' y el 'carpe diem' nes sos lletres como de xuro que nunca lo fixeren nos testos que-yos poníemos pa comentar en clase. Nos sos cantares falen de la llibertá y del nuestru derechu a amar y a ser nós mesmos como namás se pue falar na estrema xuventú y reinterpreten los símbolos de les fábules clásiques y la imaxinería surrealista cola frescura y el desenfadu que-yos correspuende.

Por eso esti día pasáu, nel prau de la fiesta de San Antoniu, sintiendo tocar y cantar a estos ermitaños, nun podía más que sentime orgullosa y feliz. Dende equí, la mio norabona.