Dende hai más de venti años paso temporaes más o menos llargues en Mallorca y raru ye l'añu que nun venga polo menos un par de veces a la islla. Con esta tierra tengo un idiliu iniciáticu, un pactu íntimu que sería difícil desplicar. Equí tengo amigos y amigues mallorquines, equí radacté la mio tesina -n'otru branu yá lloñe- baxu la solombra protectora d'un algarrobu en Can Cifre, equí fixi la traducción al castellanu de 'La tierra entero' y equí acabé polo menos otros dos llibros que recuerde. Volver a esti paisaxe y a esti mar ye pa min un ritual y un reencuentru cola felicidá y la mio fidelidá a la islla ta más p'allá de les pequeñes decepciones.

Sin embargu, a lo llargo d'estos ventitantos años tamién tengo visto cómo se tresforma esti paisaxe pisotiáu pola invasión descontrolada y salvaxe del cementu sobre les costes. Tamién hai un añu xusto tuvi la oportunidá de pasar una bona parte de la primavera nel Cabu de Gata, n'Almería, y nun podré olvidar la imprensión que me produxo la contemplación de la mole d'hormigón que taben llevantando en Carboneras. Pela carretera que va dende Mojácar a San José, cuando enfiles una baxada espectacular col mar de fondu, de sópitu, una especie de monstru inmensu tápate la vista como si fuera una gran cetáceu marín salíu quién sabe de qué pesadilla. Ye'l mesmu que ta saliendo dende hai un tiempu nos medios de comunicación y que se ta convirtiendo nel estandarte de la especulación demente y corrupta de la costa mediterrania pero, de verdá, que la so visión 'al natural' supera con muncho cualquier impresión que puedan dar les fotos o les imaxes televisives.

Ayeri mesmo tuvi una experiencia asemeyada aunque a menor escala. Como yera l'últimu día na isla dióme por recorrer, con un aquello de señaldá, dalgunos llugares a los que nun diba dende hai bien d'años. Quería dame l'últimu bañu nuna d'eses cales nes que cuesta un pocu llegar porque nun hai nin señales y depués tienes que caminar un ratu mediu arrastrándote polo pindiu que ye'l camín. Pero nada d'eso sucedió. Lo primero foi atopar indicadores de carretera que señalaben la dirección con absoluta claridá p'acabar comprobado que la propia carretera terminaba-anque de mala manera-na propia playa onde podíes aparcar tranquilamente'l coche sobre la mesma arena. Ellí, onde yo recordaba un monte de pinos intactu, diben apruciendo cases y más cases, xalés, adosaos y urbanizaciones esconligaes de les roques como eses figures imposibles de Escher. Yo nun sé cómo se puede frenar esta insoportable invasión del cementu sobre los espacios naturales, esta avalancha del hormigón y l'alquitrán sobre lo qu'enantes fueren camperes y llabrantíos. Pero de xuro qu'hai fórmules y maneres racionales y xustes de facelo.

Agora que l'avión despega otra vez elevándose sobre la tierra, quiero pensar qu'ambaxu de tou esi cementu inda respira la islla que yo conocí y que, de dalguna manera, en dalgún llugar, tará esperando por min.