EL señor Javier Fernández, a la sazón secretariu xeneral del PSOE n'Asturies, ye la personalidá más sobresaliente de la política patria nos caberos tiempos. Ye un políticu discretu, fala namás cuando quier y non cuando-y entruguen, ye quien a amarrar a les 'families' del socialismu astur construyendo una paz de les de durar munchos años, puede cohabitar con un presidente como Vicente Álvarez Areces y hasta dexa-y sitiu, y sabe acolumbrar a los enemigos políticos pa dir poniéndo-yos pilancos yá de lloñe. Como bon líder, la so especialidá son les 'idees fuerza', que depués los acólitos van repetir dayures, anque delles vegaes nun les atalanten, y qu'hasta se van convertir en dogma, ello ye, van ser verdá anque nun se puedan demostrar. Por eso les referencies del secretariu de la FSA, los díes 3 y 4 d'esti mes, a la llingua asturiana y la cooficialidá, a la cooficialidá y el nacionalismu, al nacionalismu y a nun se sabe qué más nun pueden cae-y embaxo a naide.
El camín abriólu a primeros d'esti añu cola consigna de que la oficialidá del asturiano trayía abellugada una obligación pa los ciudadanos, que los derechos llingüísticos nun son eso, derechos, sinón obligaciones (de les inxustes, de les qu'ellos llamen 'imposiciones') pa unes persones pacífiques que nun tienen nenguna culpa. Esa 'idea fuerza' abultó-yos a munchos un recursu dialécticu na engarradiella con IU, sociu de gobiernu, ente una negociación estatutaria que nun queríen los socialistes y que podía facer naufragar el Gobiernu. Pero resultó ser la espicha pela que van dir saliendo los pegollos sobre los qu'afitar el discursu pa los años vinientes. A saber: la llingua asturiana ye una 'imposición' y la imposición ye de los "nacionalistes".
En concreto, según EL COMERCIO del domingu 5 de payares, Fernández apellidó a la cooficialidad de «carga» pa los asturianos y dixo que «hay un proyecto para poner en marcha el nacionalismo en Asturias a través de la mencionada cooficialidad». Ello ye, los derechos llingüísticos que se reclamen cola cooficialidá nun son, según el 'xurista' Javier Fernández, derechos de les persones, como lo son en tol mundu civilizáu, que son "imposiciones" d'unos nacionalistes que nin tienen güei asientu na Xunta Xeneral, nin exercen violencia sobre naide, nin manifiesten querer que naide dexe de falar castellano por obligación. Ello ye, tamién, que'l nacionalismu, supónse qu'asturianu, porque'l centralista yá lu practica él, quier usar la cooficialidá como guiada pa remanar lo qu'agora nun algama.
¿Por qué estes 'idees fuerza' de Javier Fernández? ¿Por qué pon condiciones a un derechu humanu (poder usar dafechu y en cualquier llugar el propiu idioma) diciendo que son 'coses de los nacionalistes'? ¿Por qué piensa que la cooficialidá diba servir al asturianismu políticu cuando, con ella y según él, diba tener asina fartucu'l so únicu y másimu aliendu? Por tres razones. Primera, porque ye tradición del socialismu asturianu en tola democracia conceder derechos, oportunidaes o, simplemente, xusticia namás a los colectivos sociales o a les persones 'de casa', a los que puedan apuntase a la llista de los agradecíos. Y col asturianismu, pola razón que seya, él cuenta que nada tien que facer. L'acción de gobiernu socialista n'Asturies enxamás camienta sólo nel interés xeneral, la xusticia o inxusticia, lo amañoso o lo inútil, siempre cuenta tamién cola rentabilidá partidaria. Eso tien un nome. Segunda, porque ye tradición del socialismu asturianu en tola democracia usar instrumentos públicos (y una cooficialidá ye un instrumentu públicu, al serviciu de los derechos de los ciudadanos) p'afitar el propiu proyectu políticu y crear 'clientela' al so serviciu electoral.
Javier Fernández camienta que l'asturianismu diba facer lo mesmo qu'ellos faen davezu, lo mesmo que ficieron siempre cola empresa pública, coles subvenciones públiques, coles inversiones n'infraestructures, etcétera. Eso tien un nome. Y tercero, porque nun-y importa gota facer xantaxe al nacionalismu pa dici-y: si dexáis de ser lo que sois, si vos dais y renunciáis al asturianismu (qu'él sabe que nun ye namás 'el bable'), entós podíemos iguar esto fácilmente. Entráis en nómina, al serviciu del nuestru poder (dellos yá lo tienen fecho), y entós vais tener derechu a usar l'asturianu onde vos pete.
Anunciar una conspiración («hay un proyecto para poner en marcha el nacionalismo en Asturias a través de la mencionada cooficialidad») anguañu tien poco méritu. Anunciala d'una fuerza social obxetivamente tan ruina como l'asturianismu tien coña, pero facelo pa negar el derechu humanu a usar la propia llingua tien cantu y delitu. Los derechos nun se condecen con condiciones, nin los llingüísticos, nin los civiles, nin los sociales.
