LES elecciones son el mecanismu pa poner n'hora'l reló políticu col tiempu que marca la sociedá. El mecanismu d'axuste nun ye perfectu, yá lo sabemos, pero los ciudadanos tienen la oportunidá de mover les aguyes pa iguar los atrasos o adelantos ente lo que son y quieren ellos, y lo que son y faen los políticos nes instituciones. Dexando aparte l'análisis microscópicu de los resultaos de les votaciones autonómiques y municipales n'Asturies, el reló de la política asturiana sigue marcando la mesma hora que la última llexislatura, y prácticamente la mesma que nos enseña dende que tenemos democracia. En delles coses ye una hora que nun diz cola que marquen otres partes d'España, una hora qu'avisa d'un anacronismu que, como les elecciones son tan recientes, nun vamos atribuir namás a los políticos, que tamién habrá qu'apuntar a los ciudadanos.
Primer anacronismu. La tendencia natural, anque lenta, hacia'l bipartidismu derecha-izquierda de les fuerces estatales lleva n'Asturies unos cuantos años de retrasu. Ello ye, la opción electoral d'IU nun esiste prácticamente yá en munches comunidaes, onde se presenta nun tien representación o tienla mui menguada, y onde la algama nun cuenta pa formar gobiernu. Menos n'Asturies. Equí, el tradicional comunismu español, camudáu n'izquierda plural y arimáu al cabu a nacionalismos y ecoloxismos, collecha, anque a la baxa, prácticamente'l diez por cientu de los votos y, depués de l'asignación de representantes, ye decisivu pal Gobiernu asturianu y pal de munchos conceyos. Menos en Madrid (onde con una mayoría absoluta del PP la 'izquierda del PSOE' llega al 8,89% de los votos) y en Cataluña (onde en 2006 Iniciativa recibió'l 9,56%), que tienen resultaos asemeyaos, nun llogra IU tantes papeletes en nengún llugar. Muncho más vagar nos llevaría analizar el fenómenu de Ciudadanos por la Izquierda, que tien tanto de repunancia hacia la collaboración gubernamental d'IU como de noxu pola 'deriva asturianista' de la coalición.
Segundu anacronismu. La derecha asturiana sobrevive electoralmente como eterna segundona abellugada nun 'síndrome d'Estocolmo' ideolóxicu. Ye palmario cómo'l programa electoral d'Ovidio Sánchez, les sos propuestes electorales y el so discursu mesmu tán contaminaos polos tópicos de la izquierda en xeneral y del rival políticu directu (PSOE) en particular. Como nun sucede en nengún otru llugar d'España, la derecha asturiana asonsaña'l discursu del adversariu y ufierta más fondos mineros, más obra pública, más subvenciones, separándose peligrosamente del discursu lliberal que tendría que ser la so sencia y de los aires que soplen nel mesmu partíu n'otres partes d'España, especialmente en Madrid. Ello lleva, como consecuencia, a una alternativa política que nun acaba de llograr credibilidá y a que sectores importantes y con pesu de la sociedá asturiana, que tendríen al PP como representantes naturales, tengan más enfotu tovía güei na izquierda más moderada. Amás, la derecha asturiana carez dafechu d'un discursu pa los problemas autóctonos (como sí lu tienen en Baleares, o Galicia o Navarra, por exemplu) y namás ufierta una victoria electoral estatal con ministros asturianos como solución a la nuestra dependencia del presupuestu. Esti últimu anacronismu asítianos nos tiempos de la Restauración.
Tercer anacronismu. Nel mapa políticu de la España autonómica, Asturies ye una isla onde nun cuayen los proyectos autónomos rexonalistes-asturianistes-nacionalistes. Nun fadría falta citar exemplos, pero dende los regionalistas cántabros (segunda fuerza política yá na vecina comunidá), pasando polos 'tradicionales' nacionalismos vascu, gallegu y catalán, hasta aportar a los 'riojanos progresistas', nun hai comunidá que nun tenga un espaciu institucional pa les fuerces propies. Unes queden namás pa una oposición testimonial, otres son fuerces de gobiernu xunto col PSOE o'l PP, y delles son el partíu políticu exa de les instituciones; unes son más o menos recientes o coyunturales, otres nacieron cuando la transición y delles espresen sentimientos de nacionalidá.
Ye lo mesmo, el mapa políticu asturianu ye l'únicu que nun tien aportación 'propia' a les sos instituciones, porque hasta onde nos abulta a simple vista que tampoco la hai (Extremadura, por exemplu) les candidatures del PSOE y del PP preséntense con unes 'estensiones' frutu del alcuerdu con grupos locales (PSOE-Regionalistas y PP-Extremadura Unida).
Los anacronismos políticos asturianos nun son d'agora, tienen que ver con una estructura social enxencle, con una rede productiva atrasada, con una mentalidá y unos discursos (políticos, sociales y culturales) que viven de les rentes del sieglu pasáu y hasta del otru, y son, de xuru, un espeyu de nosotros mesmos. La otra esplicación sería que la sociedá asturiana más activa, moderna y con futuru ye la que nun vota.
