Alborá Llibros, célebre llibrería xixonesa, echó'l pieslle ayeri dempués de cuasi trenta años d'actividá. Asitiada na plaza Romualdo Alvargonzález, nun primer momentu nun llocal pequeñu nel númberu 4 y más
tarde y hasta güei nel 5, la llibrería convirtióse nun referente de les llibreríes de temática asturiana, embaxo la xerencia de Xicu y Pilar Yepes.
La crisis nel mercáu del llibru lleva años pesllando llibreríes n'Asturies. La primera foi Seronda d'Avilés, a principios d'esti añu foi la Llibrería Ítaca, asitiada nel barriu L'Arena de Xixón y que tuvo en funcionamientu alredor de trés años.
Xixón queda agora ensin nenguna llibrería especializada en llibros asturianos.
Alborá, que llegó a ser editorial, editó llibros tan recordaos como 'Coses vivíes' de Mánfer de la Llera y les ediciones llitúrxiques n'asturianu, amás de los llibros de rutes de Xurde Morán, ente munchos otros.
Per munchos años foi llugar pa la presentación de llibros n'asturianu y autores como Xuan Xosé Sánchez Vicente, Antón García y Humberto González presentaron dalgunos de los sos llibros ellí. L'últimu actu públicu foi un recital de los autores de la revista 'Formientu', que se celebró'l vienres 23 de marzu. Alborá Llibros va tener difícil sustitución.
