LA otra selmana repasamos los tres primeros anacronismos asturianos que les elecciones del 27 de mayu afitaron y que yá vienen de llargo, del aniciu de la democracia mesma: la importancia electoral d'IU, mui perriba de la del restu España, la floxura de l'alternativa de dereches, el PP, estos díes más tovía d'actualidá, y l'ausencia d'opciones autóctones nes instituciones. Pero queda'l cuartu anacronismu, el del socialismu gobernante va yá pa trenta años, col paréntesis de Sergio Marqués pel medio. Un anacronismu que tien que ver cola poca, o nenguna, relación ente los actos de gobiernu y los resultaos electorales, ello ye, nun importa nada que lo faigan bien o mal, porque la respuesta electoral de los asturianos nun se guía por esi interés; y que tampoco relaciona la situación xeneral de decaimientu (los asturianos vivimos nuna xeremiada permanente va yá trenta años) y el consistente votu socialista. ¿Por qué?
Primero, porque'l fatalismu asturianu tien pocu enfotu en que les persones puedan camudar les coses. El mitu del pueblu resistente, pero perdedor al cabu en toles ocasiones, materialízase contemporáneamente nel otru mitu de la 'pequeñez' y del aislamientu asturianos como esplicación del argayu de la nuestra prosperidá: somos pocos y nun tenemos carreteres por culpa de la nuestra orografía endemongada, qué-y vamos facer. Asina, el socialismu asturianu llogra que naide-y eche la culpa de los males qu'en cada momentu nos puedan cayer sobre los costazos. Si la industria tradicional y la lleche s'escosaron como fonte en veranu, será culpa d'Europa, cómo nos van facer casu, colo pequeños que somos y lo lloñe que tamos.
Segundo, porque les consecuencies de la Guerra Civil y del franquismu, muncho más que n'otros llugares, siguen moviendo'l votu, de los que voten. Resulta plasmante la resistencia de los asturianos a votar 'contra la historia' que se-yos vieno contando, una historia astrada de güelos fusilaos, tíos encarcelaos, primos-nietos esilaos Si los d'ún nun lo faen bien, o anda unu un poco gachu, a lo más que llega'l votante ye a quedase en casa, pero votar 'a los otros' da tovía güei una perceguera insuperable. D'esti prexuiciu aprovéchase especialmente'l socialismu, herederu, xustu o non, de la lexitimidá de los perdedores de la guerra y de bona parte de los sufrimientos posteriores, y pinta un mapa electoral nos conceyos del país (izquierda-derecha) prácticamente calcáu al de 1936.
Tercero, porque los años de poder socialista vinieron a texer una rede d'intereses, cuando clientelares, cuando emocionales, qu'emburrien al votante a un agradecimientu, si non por sucesos concretos de la esperiencia vital, sí pola solidaridá colos que manden. La mentalidá paternalista de la empresa pública, intacta dafechu ente bona parte de la población asturiana, collabora a caltener un sofitu electoral que tarrez cualquier cambiu y que siempre identifica al socialismu como'l representante auténticu de 'lo asturiano', anque los fechos de gobiernu lo puedan desmentir a cada pasu. La confraternización entama, por supuesto, nel considerable poder sindical asturianu, prácticamente al so servicu dafechu, pero aporta a tolos sectores sociales, empresarios incluyíos, que reciben, al parecer, mayor satisfacción col socialismu gobernante que con cualquier otra alternativa.
Cuarto, porque'l bipartidismu estatal (PSOE-PP) lleva dende 1982 inventando problemes de fuerte emocionalidá p'azotar del terrén electoral a cualquier otra opción. Diba ser fácil explica-yos a los asturianos por qué la Corrupción (en xeneral y con mayúscula), los GAL, la guerra d'Irak o les negociaciones con ETA tienen poco, o nada, que ver colos sos intereses y cola so prosperidá. Pero nun hai casu, estos alderiques siguen siendo'l principal argumentu electoral anque les votaciones seyan autonómiques o municipales y constituyen un plus pal PSOE (tamién pal PP) de votantes que nun son quien a identificar los intereses que se deciden en cada momentu.
Tantu tiempu de socialismu gobernante ye un anacronismu porque nun recibe censura d'una realidá que se diz manifiestamente meyorable (pa exemplu, les «lleendes urbanes» d'Areces, que depués nun se 'corporeicen' electoralmente) y ye'l cumal del anacronismu políticu institucional asturianu, que puede resumise na espresión: «Ye lo qu'hai». Como consecuencia, estos mesmos díes, un pactu ente Zapatero y Llamazares pa gobernar en 370 municipios españoles cuéntase n'Asturies como una xunta negociadora de dos hores ente IU y PSOE pa que la derecha nun gobierne en dellos conceyos (cuando en realidá ye un alcuerdu mandáu de Madrid) o los presidentes autonómicos del PP piden reformar la financiación autonómica usando la población como criteriu principal (lo que nos perxudica) y refugando l'avieyamientu de los habitantes (lo que nos beneficia) y per estos llares naide nun s'entera. Ye lo qu'hai, y lo que queda por haber.
