INSISTEN les estadístiques (parez que tienen vida propia) en revelanos la decadencia natalicia asturiana. Una de les más recientes noticies publicábala EL COMERCIO d'esti 13 de xunetu: «Asturias mantiene la tasa de natalidad más baja de la Europa de los Veinticinco». Como bien señaló Xuan Xosé Sánchez Vicente va pocu tiempu, lo raro ye que nos esmuela esta circunstancia, ¿qué más nos dará? ¿Por qué nos importa a los medios de comunicación que convierten en noticia la estadística, a los ciudadanos que lo comenten y hasta a Vicente Álvarez Areces qu'espurre'l presupuestu pa emburriar los nacimientos? Supónse que será porque, anque inconscientes, contamos tener un patrimoniu que legar a los nuestros descendientes, un patrimoniu inmaterial que, de nun tener relevu xeneracional, perderáse na borrina de la historia.
Nun ye pa que nos caigan en baxo les estadístiques del Institutu Nacional d'Estadística, ye verdá. La tasa de natalidá más baxa de la Europa de los Venticincu (7 nacimientos por cada mil habitantes y 0,98 fíos por muyer) y el mayor saldu vexetativo negativu (depués de Letonia y Bulgaria) de 4,3 por cada mil habitantes. Asturies acábase, nun ye broma, si por Asturies nos referimos a otra cosa que nun seya'l territoriu, los edificios, les sebes, los museos y les banderes que van con Fernando Alonso pel mundu alantre. Pero ¿tien eso importancia? ¿A dalguién-y duel? ¿Tenemos una herencia que dexar? ¿Por qué nun vamos tener a quién-y la dexar? De les polítiques asturianes pa la natalidá (nenguna hasta esti día) yá tenemos dicho nesti mesmu sitiu tolo que se podía dicir ('Vieyos por vocación', EL COMERCIO 5-11-2005), pero queda por saber qué nos fae tan poco prolíficos, porque tener fíos ye resultáu de la iniciativa individual, xeneralmente de dos individuos, que tomen esa decisión con más o menos determín. ¿Nun tenemos los asturianos iniciativa individual? ¿Tenémosla y afuéguenla les circunstancies? Pensar en natalidá y en prosperidá o decaimientu económicu nun tien, a esti altor, xacíu nengún. Hai países perprobes con tases mui altes y otros con elles medianes, y países ricos que nun tienen fíos y otros, como los nórdicos, onde'l relevu xeneración ye bultable. N'Asturies, ye pa camentalo, la prosperidá relativa ye alta (en niveles de renta curiosos, en menos persones que nun tienen cómo valise ensin que naide les atienda), pero l'actividá humana (económica, social, representativa) ye mui baxa.
Los asturianos nun tenemos potencia natalicia porque nun facemos relevu xeneracional de nada, siguimos adorando un pasáu que perdimos, que yá nun va volver y que, pa enriba, considérase l'atrasu en cualquier sitiu que posemos la vista. Llegamos tarde a too y nun facemos llabor anque yá tengamos la esperiencia de los demás a la vista. ¿Derrotismu, catastrofismu? Ehí tán les estadístiques de natalidá. Lo que nun tenemos ye actividá humana (económica, social, representativa) y, ente otres milenta consecuencies, nun tenemos fíos. Queremos que nos dea trabayu una empresona envede crear nosotros una empresina, o queremos que vengan turistes a rastru abiertu pero que nun construyan xalés a menos de venti kilómetros de la costa. Los espertos calculen que, de nun tar afogaes en tiempu, sueldos malcuriosos, hipoteques y obligaciones varies, les muyeres españoles diben tener el doble de fíos de los que tienen anguaño. Nun hai datos pal casu asturianu, pero yo camiento que nosotros nun nos díbemos apuntar a una mayor natalidá nin con un escenariu a la finlandesa, onde la sociedá entero te paga los gastos de la descendencia y, pa enriba, sáquente en procesión afalagándote.
Los asturianos nun tenemos fíos porque nun tenemos iniciativa, y nun la tenemos porque adoramos el pasáu: la Virxe de Cuadonga, sí, pero tamién la Revolución d'Ochobre, les carreteres con curves, la sidra ensin etiqueta, la ENSIDESA y la HUNOSA. Yá ven lo mal que me ta sentando'l veranu.
